ಒಂದು ಪ್ರೇಮ ನಿರಾಕರಣೆಯ ನಂತರ ಅನ್ನಿಸಿದ್ದು....

ನೀನು ಇಲ್ಲ ಅಂದೆ,
ಒಳ್ಳೆಯದಾಯಿತು!
ನೀನು ಒಪ್ಪಿದ್ದರೆ
ರಂಗು ಮಾತಿನಲ್ಲಿ,
ಸುಳ್ಳು ಬಣ್ಣಗಳಲ್ಲಿ ,
ಒಂದಿಷ್ಟು ದರ್ಪದಲ್ಲಿ,
ಮತ್ತೊಂದಿಷ್ಟು ಜಾತಿ - ವರ್ಗಗಳ
ವಾದ - ವಿವಾದದಲ್ಲಿ
ಮುದ್ರಿತ ಲಗ್ನ ಪತ್ರಿಕೆಯಲ್ಲಿ,
ಬಂಧು - ಬಳಗದ ಕೊಂಕು ಮಾತಿನಲ್ಲಿ,
ಮಂಟಪದ ಜಗ ಮಗದಲ್ಲಿ,
ನಂತರ
ಬೆಂಕಿ ಪೆಟ್ಟಿಗೆಯಂಥ ಮನೆಯಲ್ಲಿ,
ಅದರ ಗೋಡೆಗಳಲ್ಲಿ,
ಬಿಗ್ ಬಜಾರು ಸ್ಪೆನ್ಸರ್ ಸೂಪರ್ ಮಾರ್ಕೆಟ್ಟು ಗಳಲ್ಲಿ ,
ಬದುಕು ಒಡ್ಡುವ ಸಾವಿರ ಪ್ರಶ್ನೆಗಳಲ್ಲಿ ,
ಪವಿತ್ರವೆಂದುಕೊಂಡಿರುವ ಈ ಪ್ರೇಮ
ಉಸಿರುಗಟ್ಟಿ ನರಳುತ್ತಿತ್ತು!